ኮሮናቫይረስ (ኮቪድ-19) በገንዘብ እና በማይዝጉ ቁሶች ላይ ለ28 ቀን ሳይሞት እንደሚቆይና በሽታ ሊያስተላልፍ እንደሚችል ተገለጸ ‼️

October 12 2020

ኮሮናቫይረስ (ኮቪድ-19) በገንዘብ እና በማይዝጉ ቁሶች ላይ ለ28 ቀን ሳይሞት እንደሚቆይና በሽታ ሊያስተላልፍ እንደሚችል በአውስትራሊያ የተደረገ ጥናት አመለከተ።

ኮሮናቫይረስ ከተገመተው በላይ ለረዥም ጊዜ በቁሶች ላይ እንደሚቆይ ያረጋገጠው የአውስትራሊያ ብሄራዊ ሳይንስ ኤጀንሲ ጥናቱ የተደረገው በጥናት መለያው ሳርስ ኮቭ 2 በተሰኘው የኮቪድ-19 አምጪ ቫይረስ ላይ መሆኑ ተጠቅሷል፡፡

ይህ አዲሱ የተመራማሪዎች ግኝት ቫይረሱ ከቁሶች ወደ ሰዎች የሚተላለፍበት መጠንም ከተገመተው በላይ ፈጣን ሊሆን ይችላል ተብሏል።

ተማራማሪዎች አልትራ ቫዮሌት (ዩቪ) ብርሃን ቫይረሱን ሊገድለው እንደሚችልም መግለጻቸው ይታወሳል።

ከዚህ ቀደም የተካሄዱ ምርምሮች ኮሮናቫይረስ በገንዘብ ኖቶች እና ጠርሙሶች ላይ ከሁለት እስከ ሶስት ቀናት እንዲሁም በፕላስቲክ እና በማይዝጉ ብረቶች ላይ ደግሞ እስከ ስድስት ቀናት ሊቆይ እንደሚችል ገልጸዋል።

አውስትራሊያውያኑ ባካሄዱት ምርምር ግን ብርሀን በሌለበት እና 20 ዲግሪ ሴሊሺየስ ሙቀት ባለው ክፍል ውስጥ ቫይረሱ በጠርሙሶች እና በስልክ ስክሪኖች ላይ እስከ 28 ቀናት ሊኖር እንደሚችል አመልክተዋል።

ተመራማራች አክለውም በጥናቱ እንደተመለከተው ፤ ኮሮናቫይረስ ሞቃታማ በሆነ ክፍል ውስጥ ለረዥም ጊዜ አይቆይም።

በሌላ በኩል ጉንፋን የሚያስከትሉ ቫይረሶች በተመሳሳይ ሁኔታ ውስጥ ከተቀመጡ እስከ 17 ቀናት ድረስ ሊቆዩ ይችላሉ።

ቫይረሱ በጨርቅ ላይ ከ14 ቀናት በላይ እንደማይኖርም በጥናት ውጤቱ ላይ ተጠቁሟል።

የተመራማሪዎቹ ጥናት ሰዎች እጆቻቸውን እና የስልክ ስክሪኖቻቸውን በተደጋጋሚ ማጽዳት እንዳለባቸው የሚያስታውስ መሆኑ ነው የተገለፀው።

ምንጭ፡- ቢቢሲ

Leave a Comment

Your email address will not be published. Required fields are marked *

Share via
Copy link
Powered by Social Snap